ਪਿਆਰ ਪਿਤਾ ਦਾ - ਗਿਆਨੀ ਅਜੀਤ ਸਿੰਘ ‘ਫ਼ਤਿਹਪੁਰੀ’

ਮਾਂ ਦੀ ਮਮਤਾ, ਪਿਆਰ ਪਿਤਾ ਦਾ, ਪੁੱਤਰ ਕਿਵੇਂ ਭੁਲਾਵੇ?
ਪੈਰਾਂ  ਉਤੇ  ਖੜ੍ਹਾ ਕਰਨ ਲਈ , ਦਰ ਦਰ  ਠੇਡੇ  ਖਾਵੇ।
ਪੁੱਤਰ ਜਨਮ ਦੀ ਖਬਰ ਮਿਲਦਿਆਂ, ਗਿੱਠ ਗਿੱਠ  ਚੜ੍ਹਦੀ ਲਾਲੀ।
ਸੱਧਰਾਂ  ਦੇ  ਨਾਲ  ਭਰ ਗਈ ਝੋਲੀ , ਅੱਜ  ਤੱਕ ਜੋ ਸੀ ਖ਼ਾਲੀ।
ਤਾਹੀਂਓਂ  ਖੁਸ਼ੀ  ‘ਚ’  ਝੂਮ ਝੂਮ ਕੇ , ਦੌਲਤ  ਪਿਆ ਲੁਟਾਵੇ।
ਪੈਰਾਂ ਉਤੇ  ਖੜ੍ਹਾ ਕਰਨ ਲਈ , …………….
ਖ਼ਰਚ ਨੂੰ ਨਜ਼ਰ ਅੰਦਾਜ਼ ਕਰਦਿਆਂ, ੳ ੁੱਚ ਦਰਜੇ ਦੀ ਵਿਦਿਆ।
ਜਿੰਨੀ  ਲੈ  ਸਕਦਾ ਸੀ  ਦਿੱਤੀ , ਖੁਸ਼ੀ-ਖੁਸ਼ੀ ,  ਨਾ ਖਿਝਿਆ।
ਹਰ  ਪਲ  ਉਸਦੇ ਸਾਹੀਂ  ਬਿਸਮੇ , ਰੱਬ  ਤੱਤੀ ਵਾ ਨਾ  ਲਾਵੇ।
ਪੈਰਾਂ ਉਤੇ  ਖੜ੍ਹਾ ਕਰਨ ਲਈ , …………….
ਸਫ਼ਲ ਹੋਇਆ ਤਾਂ, ਲਵ-ਮੈਰਿਜ਼ ਰਾਹੀਂ,ਵਿਆਹ ਓਸਦਾ ਹੋਇਆ।
ਨੂੰਹ-ਰਾਣੀ  ਨੇ  ਘਰ  ਵਿੱਚ  ਆ ਕੇ , ਪੁੱਤਰ  ਮਾਂ  ਤੋਂ  ਖੋਹ੍ਹਿਆ।
ਫ਼ਸੀਆਂ   ਤੰਦਾਂ   ਉਲਝੀ   ਤਾਣੀ  ,  ਅੱਜ   ਕੌਣ   ਸੁਲਝਾਵੇ!
ਪੈਰਾਂ ਉਤੇ  ਖੜ੍ਹਾ ਕਰਨ ਲਈ , …………….
ਸਮਾਂ  ਬੀਤਿਆ  ਪੋਤਾ-ਪੋਤੀ ,  ਘਰ ਅੰਦਰ  ਖੇਡਣ  ਲੱਗੇ।
ਕੋਈ  ਨਾ ਪੁੱਛੇ  ਬਾਤ  ਪਿਤਾ ਦੀ , ਅਕਲ  ਨੂੰ ਜੰਦਰੇ ਵੱਜੇ।
ਜਿਸ ਨੂੰ  ਮੂੰਹੋ  ਕੱਢ ਖਵਾਇਆ , ਅੱਜ ਉਹ ਖਾਣ ਨੂੰ ਆਵੇ।
ਪੈਰਾਂ ਉਤੇ  ਖੜ੍ਹਾ ਕਰਨ ਲਈ , …………….
ਹੋਸ਼ ਕਰੋ! ਐ ਨੌਜਵਾਨ  ਪੁੱਤਰੋ , ਮਾਂ  ਪਿਓ  ਨਾ  ਸਤਾਈਏ।
ਕਪੁੱਤ ਦੀ ਥਾਂ ਸਪੁੱਤਰ ਹੋ ਕੇ , ਬਣ  ਸਰਬਣ ਸੇਵ ਕਮਾਈਏ।
ਪਿਓ ਦਾ ਕਰਜ਼ , ਪੁੱਤ ਦੇ ਨਹੀਂ ਸਕਦਾ ‘ਫ਼ਤਿਹਪੁਰੀ’ ਫੁਰਮਾਵੇ।
ਪੈਰਾਂ  ਉਤੇ  ਖੜ੍ਹਾ  ਕਰਨ  ਲਈ ,  ਦਰ  ਦਰ   ਠੇਡੇ  ਖਾਵੇ ।

ਗਿਆਨੀ ਅਜੀਤ ਸਿੰਘ ‘ਫ਼ਤਿਹਪੁਰੀ’
ਮੋਬਾਇਲ ਨੰਬਰ 8146633646