ਜ਼ਿੰਦਗੀ ਦੇ ਨਾਲ-ਨਾਲ - ਮੁਨੀਸ਼ ਸਰਗਮ

ਕਰਦਾ ਏਂ ਕਿਉਂ ਫ਼ਿਕਰ ਗ਼ਮਾਂ ਦੀ
ਚੱਲ ਜ਼ਿੰਦਗੀ ਦੇ ਨਾਲ-ਨਾਲ ।
ਉਡ ਜਾਇਆ ਕਰਦੇ ਨੇ ਤਿਣਕੇ
’ਵਾਵਾਂ ਦੇ ਚੱਲਣ ਦੇ ਨਾਲ ।
ਬਿਰਹਾ, ਦੁੱਖ, ਮਿਲਨ, ਸੁੱਖ ਸਭ ’ਤੇ
ਆਉਂਦੇ ਰਹਿੰਦੇ ਵਾਰ-ਵਾਰ,
ਪਰ ਠਹਿਰਾਅ ਦੀ ਮੌਤ ਤੋਂ ਬਚ ਜਾਹ
ਭੱਜ ਕੇ ਰਲ ਜਾਹ ਸਮੇਂ ਦੇ ਨਾਲ ।
ਇਤਬਾਰ-ਸਬਰ ਘੁੱਟ ਭਰ ਕੇ ਵੇਖੇ
ਮੈˆ ਕਈ ਸਾਗਰ ਤਰ ਕੇ ਵੇਖੇ,
ਗ਼ਮ ਦੇ ਰੇਗਿਸਤਾਨੀਂ ਤੁਰਿਆਂ
ਕੋਈ ਨਾ ਚਲਦਾ ਕਿਸੇ ਦੇ ਨਾਲ ।
ਚਿੱਤ ਤਾਂ ਹਰ ਇੱਕ ਦਾ ਥੱਕ ਜਾਂਦੈ
ਖੇਡ ਖੇਡਦਿਆਂ ਜ਼ਿੰਦਗੀ ਦੀ,
ਪਰ ਜਿਨ੍ਹਾਂ ਨੂੰ ਜਿਉਣ ਦਾ ਚੱਜ ਹੈ
ਮਨ ਸਮਝਾਵਣ ਮਨ ਦੇ ਨਾਲ ।
ਹਰ ਇਕ ਦੀ ਸੁਣ ਪਰ ਮਨ ਦੀ ਕਰ
ਤੁਰਿਆ ਫਿਰ ਤੂੰ ਕੰਨ ਲਪੇਟੇ,
‘ਸਰਗਮ’ ਵਿਚ ਜਗਤ ਦੇ ਫਿਰਦਿਆਂ
ਆਪਣੀ ਥਿਰਕਣ ਰੱਖੀਂ ਸੰਭਾਲ ।

  ਮੁਨੀਸ਼ ਸਰਗਮ

ਪਿੰਡ ਅਤੇ ਡਾਕਘਰ ਸਿਧਵਾਂ ਬੇਟ

ਜਿਲ੍ਹਾ- ਲੁਧਿਆਣਾ (142033) 

ਮੋਬਾਈਲ ਨੰਬਰ- 8146541700