ਹਾਇਕੂ - ਜਸਵਿੰਦਰ ਸਿੰਘ ‘ਰੁਪਾਲ”

ਹੁਸਨ ਤੇਰਾ,
ਚਮਕਦਾ ਸੂਰਜ,
ਚਾਨਣ ਵੰਡੇ ,
ਫੜਾਂ ਕਿੰਝ ਚਾਨਣ,
ਇਹ ਹੱਥ ਨਾ ਆਵੇ ।

ਪਿਆਰ ਤੇਰਾ,
ਹਿੰਮਤ ਨੂੰ ਚੁਣੌਤੀ,
ਕਬੂਲ ਮੈਨੂੰ ,
ਜਮਾਨੇ ਦੇ ਸਿਤਮ,
ਸਹਾਰਾਂਗਾ ਹੱਸ ਕੇ ।

ਵਾਅਦਾ ਤੇਰਾ,
ਊਠ ਬੁੱਲ ਵਰਗਾ,
ਨਂਾ ਡਿਗੇ ਕਦੇ ,
ਪਰਚਿਆ ਹੈ ਦਿਲ,
ਉਡੀਕਾਂ ਕਰੇ ਇਹ ।

ਨਖਰਾ ਤੇਰਾ,
ਇੱਕ ਜਵਾਰ ਭਾਟਾ,
ਚੜ੍ਹੇ ਉੱਤਰੇ ,
ਜਾਦੂ ਦੇ ਖੇਲ ਇਹ,
ਹੁਲਾਰੇ ਪਏ ਦਿੰਦੇ ।

ਵਤੀਰਾ ਤੇਰਾ,
ਨਿੱਘ ਦਾ ਅਹਿਸਾਸ,
ਠਰਿਆ ਦਿਲ,
ਹਰਕਤ ਮਿਲੇ ਤੋਂ ,
ਧੜਕਣ ਲੱਗਾ ।

ਤੱਕਣੀ ਤੇਰੀ,
ਛੱਡੇ ਤੀਰ ਤਿੱਖੜੇ,
ਕਰੇ ਘਾਇਲ,
ਤੜਪਣ ਜਖ਼ਮ,
ਮੱਲ੍ਹਮ ਕੌਣ ਲਾਵੇ ?

ਬੋਲਣ ਤੇਰਾ,
ਸ਼ਹਿਦ ਦੀ ਮਿੱਠਤ,
ਚਾਹੇ ਹਰੇਕ,
ਮਿਲੇ ਜਦ ਜਦ ਵੀ,
ਕੁੱੜਤਣ ਮਿਟਾਵੇ ।

ਹੱਸਣਾ ਤੇਰਾ,
ਸੰਗਤਿਕ ਫੁਹਾਰਾ,
ਨੱਚਦਾ ਚੱਲੇ,
ਮਿਲੇ ਤਾਜ਼ਗੀ ਇਕ,
ਰੱਜ ਰੱਜ ਨ੍ਹਾਈਏ ।

ਮਿਲਣਾ ਤੇਰਾ,
ਸਾਹਾਂ ਦੀ ਧੜਕਣ,
ਦੌੜੇ ਲਹੂ ਵੀ,
ਮਿਲੇ ਨਵ-ਜੀਵਨ,
ਮੁਰਦਾ ਜਿਉ ਉਠੇ ।

ਰੁੱਸਣਾ ਤੇਰਾ,
ਬਿਜਲੀ ਦਾ ਭੱਜਣਾ,
ਛਾਵੇ ਹਨ੍ਹੇਰਾ,
ਨਾ ਕੁਝ ਵੀ ਤਾਂ ਦਿਸੇ,
ਭਟਕਣ ਬਥੇਰੀ ।

ਲੜਣਾ ਤੇਰਾ,
ਪਿਆਰੀ ਸ਼ਰਾਰਤ,
ਚਲਦੀ ਰਵ੍ਹੇ ,
ਉਲਾਂਭੇ,ਡੰਗ,ਚੋਭਾਂ,
ਲ਼ੱਗਣ ਬੜੇ ਮਿੱਠੇ ।

ਤੁਰਨਾ ਤੇਰਾ,
ਪਹਾੜਾਂ ਦਾ ਰਸਤਾ,
ਵਿੰਗ ਤੜਿੰਗਾ,
ਨਿਭਾਵਾਂ ਧੁਰਾਂ ਤੱਕ,
ਤੂੰ ਫੜ ਹੱਥ ਮੇਰਾ ।

ਚੁੱਪ ਮੁੱਖੜਾ,
ਬਹੁਤ ਕੁਝ ਆਖੇ,
ਪ੍ਰੀਤਾਂ ਦਾ ਲਾਰਾ,
ਆਧਾਰ ਬਣੇ ਮੇਰਾ,
ਇਵੇਂ ਰਹੀਂ ਤੱਕਦਾ ।

 ਜਸਵਿੰਦਰ ਸਿੰਘ ‘ਰੁਪਾਲ”

  9814715796

  ਲੈਕਚਰਰ ਅਰਥ-ਸ਼ਾਸ਼ਤਰ,

 ਸਰਕਾਰੀ ਸੀਨੀ.ਸੈਕੰ.ਸਕੂਲ,

 ਭੈਣੀ ਸਾਹਿਬ(ਲੁਧਿਆਣਾ)-141126