ਹੱਕ ਪਰਾਇਆ ਖਾਂਦੇ ਜਿਹੜੇ ਵਿਹਲੜ ਮੌਜਾਂ ਕਰਦੇ ਨੇ।
ਐ ਨਾਨਕ ਤੇਰੇ ਦੇਸ਼ ਦੇ ਅੰਦਰ ਕਿਰਤੀ ਭੁੱਖੇ ਮਰਦੇ ਨੇ।
ਰਾਜੇ ਸ਼ੀਂਹ ਮੁਕੱਦਮ ਕੁੱਤੇ ਤੂੰ ਸੀ ਮੁੰਹ ‘ਤੇ ਕਹਿ ਦਿੰਦਾ,
ਅੱਜ ਦੇ ਬਹੁਤੇ ਨੇਤਾ ਲੁਕ ਛਿਪ ਹਾਕਮ ਦਾ ਦਮ ਭਰਦੇ ਨੇ।
ਸਾਰੀ ਜ਼ਿੰਦਗੀ ਠੱਗੀ, ਠੋਰੀ, ਚੋਰੀ, ਚਕਾਰੀ ਕਰ ਕਰ ਕੇ,
ਨੈਣ ਪ੍ਰਾਣ ਜਦ ਖੜ੍ਹਦੇ ਜਾਂਦੇ ਫਿਰ ਹੱਥ ਮਾਲਾ ਫੜ੍ਹਦੇ ਨੇ।
ਦਿਨੇ ਰਾਮ ਪਰ ਰਾਤ ਨੂੰ ਰਾਵਣ ਰੰਗ ਬਦਲਦੇ ਰਹਿੰਦੇ ਨੇ,
ਧਰਮ ਕਰਮ ਨੂੰ ਲਾ ਖੂੰਜੇ ਇਹ ਛੱਤੀ ਪੱਤਣ ਤਰਦੇ ਨੇ।
ਤੂੰ ਦੁਖੀਆਂ ਦੇ ਦੁੱਖ ਵੰਡਾਏ ਮੱਲ੍ਹਮ ਲਾਈ ਜ਼ਖ਼ਮਾ ‘ਤੇ,
ਲੁੱਟਣ ਅਖੌਤੀ ਸਾਧ ਲੋਕਾਂ ਨੂੰ ਕੋਈ ਵੀ ਦੁੱਖ ਨਾ ਹਰਦੇ ਨੇ।
ਕੂੜ ਪਸਾਰਾ ਸਾਰੇ ਪਾਸੇ ਤੇਰੇ ਨਾਂ ‘ਤੇ ਠੱਗੀਆਂ ਮਾਰਨ,
ਫੱਟਾ, ਬੈਨਰ ਲਾ ਲੈਂਦੇ ਓਹ ਨਾ ਸੰਗਦੇ ਨਾ ਡਰਦੇ ਨੇ।
ਮੜ੍ਹੀ, ਮਸਾਣੀ, ਪਿੱਤਰ, ਪੂਜਾ ਤੂੰ ਕਦੇ ਨਾ ਮੰਨੇ ਸੀ,
ਜੀਵਨ ਭਰ ਜੋ ਲਾਹੁੰਦਾ ਰਿਹਾ ਤੂੰ ਅਜੇ ਨਾ ਲੱਥੇ ਪਰਦੇ ਨੇ।
ਤੇਰੇ ਦੱਸੇ ਰਾਹ ਦੇ ਪਾਂਧੀ ‘ਝੱਜ’ ਵਰਗੇ ਨੇ ਟਾਂਵੇਂ, ਟਾਂਵੇਂ,
ਪਰ ਓਨ੍ਹਾਂ ਦਾ ਨੀ ਸਾਥ ਨਾ ਦਿੰਦੇ ਓਨ੍ਹਾਂ ਦੇ ਹੀ ਘਰਦੇ ਨੇ।
ਹੱਕ ਪਰਾਇਆ ਖਾਂਦੇ ਜਿਹੜੇ ਵਿਹਲੜ ਮੌਜਾਂ ਕਰਦੇ ਨੇ।
ਐ ਨਾਨਕ ਤੇਰੇ ਦੇਸ਼ ਦੇ ਅੰਦਰ ਕਿਰਤੀ ਭੁੱਖੇ ਮਰਦੇ ਨੇ।
ਜਸਵੀਰ ਝੱਜ
ਪਿੰਡ ਬੁਆਣੀ, ਜ਼ਿਲ੍ਹਾ ਲੁਧਿਆਣਾ
94170 42274
98554-59765
0 comments:
Speak up your mind
Tell us what you're thinking... !