ਮਾਂ.. ਪਹਿਲੇ ਖ਼ੱਤ ਵਿੱਚ ਮਾਂ ਸੀ ਬੋਲਦੀ-Rimmy Singh

ਮਾਂ ... ਪਹਿਲੇ ਖ਼ੱਤ ਵਿੱਚ ਮਾਂ ਸੀ ਬੋਲਦੀ,
ਮੈਂ ਤਾਂ ਹਾਂ ਰੁੱਖ਼ ਨਦੀ ਕਿਨਾਰੇ !
ਇੱਕ ਵਾਰੀ ਪੁੱਤ ਛਾਤੀ ਲੱਗਜਾ,
ਮੁੱਕ ਜਾਣੇਂ ਨੇ ਦੁੱਖ਼ੜੇ ਸਾਰੇ !
ਸੁਣਨੇ ਨੂੰ ਕੰਨ ਮੇਰੇ ਤਰਸ ਗਏ,
ਕਹਿੰਦਾ ਸੀ ਕਦੇ ਮਾਂਏ-ਮਾਂਏ...
ਸਾਡੀ ਤਾਂ ਤਕਦੀਰ ਹੀ ਮਾੜੀ,
ਹਰ ਚਿੱਠੀ ਵਿੱਚ ਅੱਥਰੂ ਆਏ !

ਬਾਪ ... ਜਦ ਬਾਪੂ ਜੀ ਦਾ ਖ਼ੱਤ ਆਏ,
ਨੈਣਾਂ ਦੇ ਵਿੱਚ ਨੀਂਦ ਨਾ ਆਏ !
ਡਰਦੇ ਸੀ ਜੋ ਦਰ ਤੋਂ ਲੰਘਣੋਂ,
ਉਹ ਲੋਕੀ ਅੰਦਰ ਬੜ ਆਏ !
ਮੁੱਕਣਾਂ ਤਾਂ ਬੜੀ ਦੂਰ ਦੀ ਗੱਲ ਹੈ,
ਕਰਜ਼ੇ ਹੋ ਗਏ ਦੂਣ-ਸਵਾਏ...
ਸਾਡੀ ਤਾਂ ਤਕਦੀਰ ਹੀ ਮਾੜੀ,
ਹਰ ਚਿੱਠੀ ਵਿੱਚ ਅੱਥਰੂ ਆਏ !

ਭੈਣ ... ਜਦ ਖ਼ੱਤ ਛੋਟੀ ਭੈਣ ਦਾ ਆਇਆ,
ਵਿੱਚ ਰੱਖੜੀ ਦੇ ਧਾਗੇ !
ਦੱਸ ਮੈਂ ਕਿਹੜੇ ਗੁੱਟ ਤੇ ਬੰਨ੍ਹਾਂ,
ਤੂੰ ਦਿਸਦਾ ਨਾ ਲਾਗੇ !
ਜਿਨ੍ਹਾਂ ਦੇ ਪਰਦੇਸ ਗਏ ਸੀ,
ਸਭ ਦੇ ਵੀਰੇ ਮੁੜ ਆਏ...
ਸਾਡੀ ਤਾਂ ਤਕਦੀਰ ਹੀ ਮਾੜੀ,
ਹਰ ਚਿੱਠੀ ਵਿੱਚ ਅੱਥਰੂ ਆਏ !

ਘਰਵਾਲ਼ੀ ... ਖ਼ੱਤ ਉਸ ਦੇ ਅੱਖ਼ਰਾਂ ਨੇ ਰਲ਼,
ਮੇਰੇ ਵੈਣ ਕੰਨਾਂ ਵਿੱਚ ਪਾਇਆ !
ਰੁੱਤਾਂ ਦੇ ਨਾਲ਼ ਮੁੜੀਆਂ ਕੂੰਜਾਂ,
ਪਰ ਤੂੰ ਮੁੜ ਕੇ ਨਾ ਆਇਆ !
ਰੁੱਖ਼ਾਂ ਨੂੰ ਪਾ ਜੱਫੀਆਂ ਰੋਵਾਂ,
ਮੈਨੂੰ ਪੰਛੀ ਵੇਖਣ ਆਏ...
ਸਾਡੀ ਤਾਂ ਤਕਦੀਰ ਹੀ ਮਾੜੀ,
ਹਰ ਚਿੱਠੀ ਵਿੱਚ ਅੱਥਰੂ ਆਏ !

Rimmy Singh, 

Distt. Ludhiana