ਇਕੋ ਜੋਤ - ਸਿਮਰਤ ਸੁਮੈਰਾ

ਮੈਂ ਇਕ ਹਰਨੀ
ਬਾਗੀਂ ਚਰਨੀ
ਨੱਚਾਂ ਜੰਗਲ ਬੇਲੇ
ਗਜ਼ ਗਜ਼ ਲੰਮੀਆਂ
ਪੁਟ ਪੁਲਾਂਘਾਂ
ਦੌੜਾਂ ਸੰਝ ਸੁਵੇਲੇ ।

ਮੈਂ ਇਕ ਮਛਲੀ
ਸੋਨ ਸੁਨਹਿਰੀ
ਲਹਿਰ ਲਹਿਰ ਨੂੰ ਚੁੰਮਾਂ
ਮੁੜ ਮੁੜ ਆਵਾਂ
ਮੁੜ ਮੁੜ ਜਾਵਾਂ
ਸੱਤ ਸਮੁੰਦਰ ਘੁੰਮਾਂ ।

ਮੈਂ ਇਕ ਨਦੀ
ਦਿਲਾਂ ਦੀ ਦਰਿਆ
ਮੇਰੀ ਅਜਬ ਕਹਾਣੀ
ਜਿੱਥੇ ਜਾਵਾਂ ਮੈਂ ਵਿਛਾਵਾਂ
ਅਮ੍ਰਿਤ ਵਰਗਾ ਪਾਣੀ ।

ਮੈਂ ਇਕ ਡਾਲੀ
ਫੁੱਲਾਂ ਲੱਦੀ
ਵੰਡਾਂ ਪਈ ਖੁਸ਼ਬੋਆਂ
ਹਰ ਰਾਹੀ ਜੋ ਲੰਘੇ ,ਸੋਚੇ
ਦੋ ਪਲ ਲਈਖਲੋਵਾਂ ।

ਮੈਂ ਇਕ ਪੌਣ
ਪੁਰੇ ਤੋਂ ਆਈ
ਮੈਨੂੰ ਨ ਕੋਈ ਰੋਕੇ
ਮੈਂ ਆਪਣੇ ਨਾਲ ਲਿਆਈ
ਪ੍ਰੀਤ ਦੇ ਗੀਤ ਪਰੋ ਕੇ ।

ਮੈਂ ਇਕ ਤਿਤਲੀ
ਰੂਪ ਦੀ ਰਾਣੀ
ਉੱਡਾਂ ਤੇ ਰੰਗ ਮਾਣਾਂ
ਹਰ ਪੱਤੇ ਤੇ ਹਰ ਡਾਲੀ 'ਚੋਂ
ਇੱਕੋ ਜੋਤ ਪਛਾਣਾਂ ।

ਸਿਮਰਤ ਸੁਮੈਰਾ 

•                                                                                                                                          Batala,
•                                                                                                                                          India 143505