ਦੁਨੀਆ ਦਾ ਗਹਿਣਾ ਦੇਸ਼ ਸੀ - ਸ੍ਰ; ਸੁਰਿੰਦਰ ਸਿੰਘ "ਖਾਲਸਾ"

.ਕਰ ਪ੍ਰਨਾਮ ਸ਼ਹੀਦਾਂ  ਨੂੰ,ਸ਼ਰਧਾ ਨਾਲ ਸੀਸ ਝੁਕਾਵਾਂ ।                                                                                          ਦਿਲੋਂ ਉੱਠੇ ਕੁਝ ਵਲਵਲੇ,  ਫਿਰ ਮੈ ਇਉਂ ਖੋਹਲ ਸੁਣਾਵਾਂ ।
ਉਧਮ ਸਿੰਘ  ਦੀ  ਰੂਹ   ਨੂੰ,   ਇਕ  ਅਰਜ਼  ਪਹੁੰਚਾਵਾਂ ।
ਭਗਤ ਸਿੰਘ  ਤੇ  ਸੁਖਦੇਵ  ਨੂੰ,    ਅੱਜ  ਵਾਸਤੇ  ਪਾਵਾਂ ।
ਚੰਦਰ ਸ਼ੇਖਰ ਤੇ ਰਾਜ ਗੁਰੂ  ਨੂੰ,   ਇਹ ਸੰਦੇਸ਼ ਪਹੁੰਚਾਵਾਂ ।
ਕੀ ਹੋਇਆ  ਭਾਰਤ  ਦੇਸ਼  ਨੂੰ,   ਉਨ੍ਹਾਂ ਨੂੰ ਕੀ  ਬਤਾਵਾਂ ।
ਜਿਸਦੇ ਲਈ ਗਲ  ਤੁਸਾਂ ਨੇ,    ਫਾਂਸੀ  ਨੂੰ  ਲਾਇਆ ।
ਉਸੇ ਦੇਸ਼ ਦਾ  ਲੋਟੂਆਂ,   ਕੀ  ਹੈ  ਹਾਲ   ਬਣਾਇਆ ।
ਅੱਜ ਥਾਂ ਥਾਂ ਸਾਂਡਰਸ  ਡਾਇਰਾਂ,  ਆਤੰਕ  ਮਚਾਇਆ ।
ਨੌਜਵਾਨ ਸਾਡੀ ਕੌਮ  ਦਾ,   ਜਿਨ੍ਹਾ  ਮਾਰ  ਮੁਕਾਇਆ ।
ਗੋਰੇ ਭਜਾਏ ਸਨ ਤੁਸਾਂ  ਨੇ,   ੲੈਥੇ   ਕਾਲੇ  ਬਹਿ ਗਏ ।
ਲੁਟੇਰੇ ਸਨ ਉਹ ਬਾਹਰ ਦੇ, ਇਹ  ਘਰ ਨੂੰ ਹੀ ਪੈ ਗਏ ।
ਸੋਨ  ਚਿੜੀ  ਲੋਕ  ਆਖਦੇ,  ਇਨ੍ਹਾਂ  ਕੰਗਾਲ   ਬਣਾਇਆ ।
ਦੁਨੀਆ ਦਾ ਗਹਿਣਾ ਦੇਸ਼  ਸੀ,  ਇਨ੍ਹਾਂ  ਗਹਿਣੇ  ਪਾਇਆ ।
ਮੌਕਾ ਪ੍ਰਸਤ ਇਸ ਦੇਸ਼ ਦਾ,  ਹਰ ਲੀਡਰ (ਬੰਦਾ)  ਹੋਇਆ ।
ਸਵੈਮਾਨ  ਸਾਡੇ  ਦੇਸ਼  ਦਾ,  ਪਤਾ  ਨਹੀ  ਕਿਥੇ   ਖੋਇਆ ।                                                                                         ਕੌਮੀ  ਅੰਦੋਲਣਾਂ  ਵਿੱਚ  ਸਦਾ,   ਜਿਨ੍ਹਾਂ  ਪਿੱਠ   ਦਿਖਾਈ ।
ਅੱਜ ਹੋ ਗਏ ਮੋਹਰੀ ਦੇਸ਼  ਦੇ,   ਜਾਣ  ਦੋਂਹ ਹੱਥੀਂ  ਖਾਈ ।
ਤੁਸਾਂ  ਨੇ    ਹੱਕ   ਬਰਾਬਰੀ,      ਸੋਚੇ  ਸੀ   ਸਭ ਨੂੰ ।
ਇਹ  ਦਿੰਦੇ ਪੁੱਤ  ਭਤੀਜਿਆਂ,  ਤੇ  ਭੁੱਲ ਗਏ  ਜਗ ਨੂੰ ।
ਫਿਰਕਾ ਵਾਦ ਤੇ ਨਫਰਤ ਦੀ,   ਹੈ ਇਨ੍ਹਾਂ  ਅੱਗ  ਲਾਈ ।
ਕੰਨਿਆ ਕੁਮਾਰੀ ਤੋਂ ਕਸ਼ਮੀਰ ਤੱਕ, ਸਭ ਜਾਣ  ਜਲਾਈ ।
ਐ ‘ਸੁਰਿੰਦਰ’  ਘੁਟਾਲਿਆਂ ਦੇਸ਼ ਵਿੱਚ,  ਹੈ ਅਤੰਕ  ਮਚਾਇਆ ।
ਖਾ  ਗਏ  ਰਾਖੇ    ਖੇਤ  ਨੂੰ,    ਭੋਰਾ   ਤਰਸ  ਨਾ    ਆਇਆ ।
ਹੈ ਤਰਲਾ ਸ਼ਹੀਦੋ ਦੇਸ਼ ਦਿਉ,  ਇਕ ਫੇਰਾ ਪਾਉ ॥
ਡੁਬਦਾ ਬੇੜਾ ਦੇਸ਼  ਦਾ,   ਇਸਨੂੰ  ਆਣ ਬਚਾਉ ॥                                                                                                                                                                                          

       ਸ੍ਰ; ਸੁਰਿੰਦਰ ਸਿੰਘ "ਖਾਲਸਾ" 

                                                                                  ਮਿਉਂਦ ਕਲਾਂ,{ਫਤਿਹਾਬਾਦ}                            ਮੋਬਾਈਲ=97287 43287, 

94662 66708,