ਤੂੰ ਮਹਿਬੂਬ ਪਤਾ ਕਿਵੇਂ ਦਾ ਏ - ਰਸ਼ਮੀ ਸ਼ਰਮਾ

ਤੂੰ ਮਹਿਬੂਬ ਪਤਾ ਕਿਵੇਂ ਦਾ ਏ ...
ਬਿਲਕੁਲ ਕਿਸੇ ਆਸਮਾਨ ਨੂੰ ਛੂ ਰਹੇ ਪਰਬਤ ਵਰਗਾ
ਜੋ ਆਪਣੀ ਮੁਹੱਬਤ ਨੂੰ ਹਮੇਸ਼ਾ
ਜਿੰਦਗੀ ਦੀ ਸ਼ਿਖਰ ਤੇ ਰੱਖਣਾ ਚਾਹੁੰਦਾ ਏ ..

ਮਹਿਬੂਬ ਖੁੱਲੇ ਆਸਮਾਂ ਵਰਗਾ
ਜੋ ਆਪਣੀ ਮੁਹੱਬਤ ਲਈ
ਜਿੰਦਗੀ ਭਰ ਆਪਣੀਆਂ ਬਾਹਵਾਂ
ਖੁੱਲੀਆਂ ਰੱਖਣਾ ਚਾਹੁੰਦਾ ਏ ..

ਮਹਿਬੂਬ ਸੂਰਜ ਦੀ ਸੰਧੂਰੀ ਕਿਰਣਾਂ ਵਰਗਾ
ਜੋ ਆਪਣੀ ਮੁਹੱਬਤ ਦੇ ਚਿਹਰੇ ਤੇ
ਜਿੰਦਗੀ ਭਰ ਚਮਕਣਾ ਚਾਹੁੰਦਾ ਏ ..

ਮਹਿਬੂਬ ਵਗਦੇ ਪਾਣੀ ਵਰਗਾ
ਜੋ ਕਿਨਾਰੇ ਤੇ ਖੜੀ ਆਪਣੀ ਮੁਹੱਬਤ ਨੂੰ
ਜਿੰਦਗੀ ਭਰ ਛੂ ਕੇ ਲੰਘਣਾ ਚਾਹੁੰਦਾ ਏ ..

ਮਹਿਬੂਬ ਜਿਹਦੀ ਮੁਹੱਬਤ ਦੇ ਵਾਂਗ ਹੀ
ਉਹਦੇ ਵੀ ਖਿਆਲਾਂ ਨੂੰ
ਹਕ਼ੀਕਤ ਦਾ ਧਰਾਤਲ
ਨਹੀ ਮਿਲਦਾ ਪਰ
ਆਪਣੀ ਮੁਹੱਬਤ ਲਈ ਖੁਆਬਾਂ 'ਚ
ਜਿੰਦਗੀ ਭਰ ਮੁਲਾਕਾਤਾਂ ਕਰਨਾ ਚਾਹੁੰਦਾ ਏ .......!!!

ਰਸ਼ਮੀ ਸ਼ਰਮਾ 

# 892 , ਉੱਚਾ ਖੇੜਾ ,

ਰੋਪੜ